Un o ddigwyddiadau mawr yr wythnos hon oedd yr hyn a ddigwyddodd ym Melfast rhwng Martin McGuinness ac Elisabeth yr Ail. Ia, yr ysgwyd llaw a fu rhyngddynt. Eiliad fer, ond yn siarad cyfrolau am ddatblygiad y broses heddwch. Wedi’r holl benawdau sydd wedi bod dros y blynyddoedd am y bomiau a’r lladd, dyma bennawd o fath gwahanol er bod rhai yn amau gwerth yr arwydd yma o gymod. Mae’r creithiau yn ddyfnion iawn ar y ddwy ochr ac a fydd un ystum fer fel hyn o ysgwyd llaw yn gwneud unrhyw wahaniaeth o gwbl? Ydach chi’n edmygu’r ddau am ysgwyd llaw? Doedd hi ddim yn hawdd dwi’n siŵr.
A oes angen cymodi arnom ni? Dydw i ddim yn adnabod neb sy’n gallu dweud yn onest ei fod yn byw mewn cymod hefo pawb. Fe fydd yna densiwn yn y teulu, gyda chymdogion a chydweithwyr ar ryw adeg yn ein bywyd o hyd ac efallai y bydd yr holl beth yn dal i rygnu ‘mlaen am flynyddoedd. Efallai ein bod wedi stopio trio gwneud rhywbeth am y peth neu’n meddwl fod y cyfrifoldeb i gymryd y cam cyntaf ar rhywun arall. Mae’r blynyddoedd yn pasio tra rydan ni yn aros iddyn nhw ddod atom ni! Mae Iesu yn adnabod ein cyflwr ac y mae’n rhoi cyngor i ni. Dyma i chi ddau ohonynt:
“ Felly os wyt yn cyflwyno dy offrwm wrth yr allor, ac yno’n cofio bod gan dy frawd rywbeth yn dy erbyn, gad dy offrwm yno o flaen yr allor, a dos ymaith: myn gymod yn gyntaf â’th frawd, ac yna tyrd a chyflwyno dy offrwm.” (Mathew 5:23-24)
A hefyd, “Clywsoch fel y dywedwyd, ‘Car dy gymydog a chasa dy elyn.’ Ond yr wyf fi yn dweud wrthych: carwch eich gelynion, a gweddïwch dros y rhai sy’n eich erlid: felly fe fyddwch yn blant i’ch Tad sydd yn y nefoedd …” (Mathew 5:43-44)
Wrth i ni ymdrechu yn nerth yr Ysbryd Glân i faddau i’n gilydd a chymodi a’n gilydd rydan ni yn dod yn debyg i’n Tad nefol. Ac y mae angen ymdrech! Nid ar chwarae bach y daeth yr ysgwyd llaw yn realiti ac nid ar chwarae bach y mae Duw yn delio hefo ni. Mae Duw wedi ein caru ni pan oeddem yn elynion. Nid ysgwyd ein llaw mewn ystum o gymod ond ein caru ni! Dyma beth yw rhyfeddod! Go brin fod cariad rhwng y Frenhines a Dirprwy Brif Weinidog Gogledd Iwerddon, ond dyna sydd yn wir amdanom ni a Duw. Wrth i ni dderbyn ei ras a’i faddeuant rydan ni hefyd yn gweld cymaint yw cariad Duw y Tad. Y mae Ef wedi ein cymodi ni ag Ef ei hun trwy’r groes. Y groes sydd yn chwalu’r muriau sydd rhyngom ac yn lladd yr elyniaeth sydd rhyngom a Duw a rhyngom a’n gilydd. (Effesiaid 2: 14-16) Boddi’r elyniaeth yng ngwaed y groes. Dyma lle y cawn ninnau’r nerth i ufuddhau i Iesu ac i ddod i garu.
Croeso i chi i oedfaon y dydd. Boed i ni brofi grym cymod, maddeuant a chariad Duw hefo’n gilydd heddiw.
Aneurin
Llais Bro Aled 01.07.12(Word)
